၂၀၁၇ ချန်ပီယံ-ခင်အောင်အေး

၂၀၁၇ ချန်ပီယံ
---------------------ခင်အောင်အေး

စည်ကားသော လမ်းမများပေါ်၌
မစည်ကားသော အတွေးအခေါ်များပြန့်ကျဲ
ဓါတ်တိုင်က ဓါတ်တိုင်ကို ကောင်းသောညနေခင်းပါ လို့
အနုပညာဟာ သူ့ချည်တိုင်ထဲမှာ တိုင်ပတ်နေတဲ့အချိန်ပေ့ါ

င့ါကို ငါ ပြန်ရမလား
င့ါကို ငါ မင်းဆီက ပြန်ရမလား
ငါ့ကို ငါ ဘယ်လိုစီမံရမှန်းမသိ စိတ်ရှုပ်ထွေးနေရချိန်
ငါ့ကို ငါ ပြန်မလိုချင်ဘူး
မိုးက ဘယ်လိုပဲ ပုံဖော် ပုံဖော်
ကိုယ့်ရွှံ့ကိုကိုယ် ဗိုင်းကောင်းကျောက်ဖိထားဖို့ လိုလိမ့်မယ်
ပလက်ဖောင်းတွေရဲ့ ပဲ့ရွဲ့မှုကနေ သမိုင်းကို ခြေရာကောက်ကြစို့
အေးစက်နေတဲ့ အထိအတွေ့တွေဟာ
အေးစက်နေတဲ့ ရာသီဥတုထံကို ပို့စ်ကဒ်ပို့လိုက်တယ်
အေးစက်နေတဲ့ ခေါင်းလောင်းများဆီက
အေးစက်နေတဲ့ ၀မ်းခေါင်းသံ ပဲ့တင်များ
မျက်ရည်တွေ လို့ ဘာအကြောင်းနဲ့မှ သဖန်းပိုးမလုပ်ချင်ပါ
မျက်ရည်တွေ လို့ ဘာအကြောင်းနဲ့မှ ခါးတမာနှယ်မဖွဲ့နွဲ့လိုပါ
မျက်ရည်တွေ လို့ ဘာအကြောင်းနဲ့မှ ပရိယယ်ေ၀၀ုစ်မပြုချင်ပါ
မျက်ရည်တွေ လို့ ဘာအကြောင်းနဲ့မှ ဘာအကြောင်းနဲ့မှ --
ညက ညကို ပိပိရိရိ လှည့်စားသလို
ငါက င့ါကို ပိပိရိရိ လှည့်စားလိုက်ပါတယ်
အပျော်လွန်နေတဲ့ ဗန်ဒါရွက်တွေကတော့
ကတ္တရာလမ်းမပေါ်မှာ တလိမ့်လိမ့်နဲ့။ ။

၂၈ ဇူလိုင် ၂၀၁၇ ပုဇွန်တောင်မြို့နယ် ၂၀း၃၄ နာရီ